Azərbaycanın Yaşıl Enerji Dəhlizi layihəsinin fizibilite tədqiqi başa çatdı

Azərbaycanı, Gürcüstanı, Rumıniyanı və Macarıstanı birləşdirəcək Yaşıl Enerji Dəhlizi layihəsinin texniki-iqtisadi əsaslandırması başa çatdırılıb və dörd ölkənin hökumətləri tərəfindən təsdiqlənib. APA-Economics xəbər verir ki, bu barədə Green Energy Corridor Power Company (GECO) şirkətinin investisiya təqdimatında məlumat verilib.

Sənədə əsasən, layihə inkişaf mərhələsinə keçir. Bu mərhələdə görüləcək işlər və son investisiya qərarına aparan yol xəritəsi növbəti addımlara daxildir. GECO potensial investorları və tərəfdaşları layihədə iştirak üçün maraqlarını bildirməyə dəvət edir.

Layihə hər biri 1,3 GW tutumlu üç yüksək gərginlikli sabit cərəyan xəttinin mərhələli tikintisini nəzərdə tutur. Birinci xəttin 2032-ci ildə, ikinci xəttin 2036-cı ildə və üçüncü xəttin 2040-cı ildə istifadəyə verilməsi planlaşdırılır.