Özbəkistan BMT-nin Baş katibi vəzifəsinə BƏƏ-li Lana Nusseybanın namizədliyini dəstəkləyir

Özbəkistan BƏƏ Dövlət Naziri və BMT-də keçmiş daimi nümayəndəsi Lana Zaki Nusseybanın Birləşmiş Millətlər Təşkilatının Baş katibi vəzifəsinə namizəd göstərilməsini dəstəkləyir. Bu barədə Özbəkistan Xarici İşlər Nazirliyi bəyanat yayıb.

Bəyanata görə, BMT-nin yeni Baş katibinin təyin edilməsi qlobal çağırışların artdığı şəraitdə təşkilatın nüfuzunun möhkəmləndirilməsi və fəaliyyətinin səmərəliliyinin artırılması baxımından xüsusi əhəmiyyət kəsb edir. Bəyanatda qeyd olunub ki, yeni Baş katib yüksək peşəkar bacarığa, zəngin diplomatik təcrübəyə və beynəlxalq sülhün, təhlükəsizliyin və davamlı inkişaf məqsədlərinə nail olmaq üçün üzv dövlətlərin səylərini birləşdirmək qabiliyyətinə malik olmalıdır.

Hal-hazırda vəzifədə olan Antonio Quterreşin səlahiyyətləri 2026-cı ilin sonunda başa çatır. Yeni rəhbər 2027-ci il yanvarın 1-dən vəzifəsinə başlamalıdır. Baş katib beş illik müddətə seçilir və bir dəfə də yenidən seçilə bilər. BMT Nizamnaməsinə əsasən, onu Təhlükəsizlik Şurasının tövsiyəsi əsasında Baş Assambleya təyin edir. Daha əvvəl Təhlükəsizlik Şurasının namizəd barədə razılığa gələ bilmədiyi bildirilmişdi.