Qazaxıstan: Tokayev minimum əmək haqqının 100 min tengeyə qaldırılmasını tapşırdı

Qazaxıstan Prezidenti Qasım-Jomart Tokayev ölkə xalqına müraciətində minimum əmək haqqının 85 min tengedən 100 min tengeyə qaldırılmasını hökumətə tapşırdı. Xəbəri Akordaya istinadən NUR.KZ yayıb. Tokayevin sözlərinə görə, tapşırıq 1 yanvardan həyata keçirilməlidir və bu, 1,8 milyon insanın, o cümlədən büdcədən maaş alan 370 mindən çox işçinin gəlirini artıracaq.

Prezident həmçinin ilkin tibbi-sanitar yardım sisteminin modernləşdirilməsinə böyük önəm verdiyini bildirdi. Ümumi təcrübə həkimlərinin səlahiyyətlərinin genişləndirilməsi və bu sistemin maliyyələşdirilməsinin tədricən artırılması planlaşdırılır. Hökumətə həmin sahədə çalışan mütəxəssislərin əmək haqqının iş stajından asılı olaraq 40 faiz artırılması tapşırılıb. Bu, 1 yanvardan başlayacaq və 77 mindən çox mütəxəssisin gəlirini artıracaq.