Mirziyoyev Ankarada Türk Dövlətləri Təşkilatının zirvə toplantısında iştirak edəcək

Özbəkistan Prezidenti Şavkat Mirziyoyev Türkiyə Prezidenti Rəcəb Tayyib Ərdoğanın dəvəti ilə 29-30 oktyabr tarixlərində Türkiyəyə iş səfəri edəcək.

Dövlət başçısı Ankarada keçiriləcək Türk Dövlətləri Təşkilatının «Türk əsri: dildə, fikirdə və əməldə birlik» mövzusundakı növbəti zirvə toplantısında iştirak edəcək. Təşkilat çərçivəsində çoxtərəfli əməkdaşlığın, ilk növbədə ticarət-iqtisadi, investisiya, nəqliyyat-logistika və mədəni-humanitar sahələrdə, eləcə də turizm, ekologiya və təhsil istiqamətlərində genişləndirilməsi və möhkəmləndirilməsi aktual məsələləri müzakirə ediləcək.

Nümayəndə heyətlərinin rəhbərləri beynəlxalq və regional əhəmiyyətə malik aktual məsələlər barədə də fikir mübadiləsi aparacaqlar. Zirvənin yekunları üzrə Ankara Deklarasiyası və təşkilata üzv ölkələr arasında qarşılıqlı faydalı tərəfdaşlığın inkişafına yönəlmiş bir sıra birgə qərar və sənədlərin qəbul edilməsi planlaşdırılır.