Özbəkistanlı Mirvahid Azimov Türk Dövlətləri Təşkilatının yeni Baş katibi oldu

Özbəkistanın xarici işlər nazirinin müavini Mirvahid Azimov Ankarada keçirilən Türk Dövlətləri Təşkilatının (TDT) XIII zirvə görüşündə təşkilatın yeni Baş katibi təyin olundu. O, 2022-ci ilin noyabrından bu vəzifədə çalışan Qırğızıstanın nümayəndəsi Kubanıçbek Ömüraliyevi əvəz edəcək. Özbəkistandan olan nümayəndə bu vəzifəyə ilk dəfə təyin olunur.

1980-ci ildə Daşkənddə anadan olan Azimov Dünya İqtisadiyyatı və Diplomatiya Universitetinin beynəlxalq hüquq ixtisası üzrə bakalavr və magistratura təhsilini bitirib, hüquq elmləri namizədidir. 20 ildən çox diplomatik fəaliyyəti ərzində Özbəkistan XİN-in müxtəlif struktur bölmələrində, o cümlədən Müqavilə-hüquq idarəsinə rəhbərlik edib. Dörd il Pekində Şanxay Əməkdaşlıq Təşkilatının katibliyində işləyib.

2020-ci ilin sentyabrından etibarən təxminən altı il TDT Baş katibinin müavini olub. 26 may 2026-cı ildə Özbəkistan Prezidentinin qərarı ilə xarici işlər nazirinin müavini təyin edilib. TDT Katibliyi bildirib ki, yeni Baş katibin təcrübəsinə əsaslanaraq «Türk dünyası - 2040» sənədindəki məqsədləri konkret təşəbbüslərə çevirməyi planlaşdırır.