Özbəkistan və Pakistan xarici işlər nazirləri əməkdaşlığı müzakirə etdi

Özbəkistanın xarici işlər naziri Bəxtiyor Saidov Pakistanın baş nazir müavini və xarici işlər naziri, senator Məhəmməd İshaq Dar ilə telefon danışığı aparıb. Bu barədə Özbəkistan XİN-in mətbuat xidməti məlumat verib.

Tərəflər strateji tərəfdaşlığın möhkəmləndirilməsini, ticarət-iqtisadi və investisiya əlaqələrinin inkişafını və beynəlxalq təşkilatlar çərçivəsində əməkdaşlığı müzakirə edib. Söhbətdə qarşılıqlı ticarətin genişləndirilməsinə və perspektivli birgə layihələrin irəli aparılmasına xüsusi diqqət yetirilib.

Həmçinin Şanxay Əməkdaşlıq Təşkilatı (ŞƏT) çərçivəsində əməkdaşlıq müzakirə olunub. Özbəkistan və Pakistanın 2026–2027-ci illərdə təşkilatın müvafiq orqanlarında sədrliyi və qarşıdan gələn tədbirlərin gündəliyi nəzərdən keçirilib. Eyni zamanda BMT, İqtisadi Əməkdaşlıq Təşkilatı və İslam Əməkdaşlıq Təşkilatı çərçivəsində əməkdaşlıq və regional vəziyyət barədə fikir mübadiləsi aparılıb. Tərəflər siyasi dialoq və qarşılıqlı dəstək əsasında ikitərəfli münasibətləri inkişaf etdirməyə hazır olduqlarını təsdiqləyiblər.