Azərbaycan Milli Məclisi Özbəkistanla əbədi dostluq müqaviləsini ratifikasiya etdi

Azərbaycan Milli Məclisi Azərbaycan Respublikası ilə Özbəkistan Respublikası arasında əbədi dostluq haqqında Müqaviləni və pensiya təminatı sahəsində əməkdaşlıq haqqında Sazişi ratifikasiya edib. Trend-in müxbirinin xəbərinə görə, məsələ Milli Məclisin bugünkü plenar iclasında müzakirə olunub.

Hər iki sənəd 2026-cı il avqustun 23-də Daşkənd şəhərində imzalanıb. 11 maddədən ibarət Müqavilənin əsas məqsədi dostluq, strateji tərəfdaşlıq və müttəfiqlik münasibətlərinin möhkəmləndirilməsi və müxtəlif sahələrdə əməkdaşlığın inkişaf etdirilməsidir. Müqaviləyə görə, Tərəflər digərinin suverenliyinə, təhlükəsizliyinə və ərazi bütövlüyünə zərər vuran bloklarda və ittifaqlarda iştirak etməyəcək, öz ərazilərindən digər Tərəfə qarşı istifadəyə yol verməyəcəklər. Müqavilə qeyri-müəyyən müddətə bağlanılır və ləğv niyyəti barədə yazılı bildirişdən on iki ay sonra ləğv edilir.

26 maddədən ibarət Saziş vətəndaşların pensiya hüquqlarının təmin edilməsini və bu sahədə əməkdaşlığın inkişafını nəzərdə tutur. Pensiyalar avro və ya ABŞ dolları ilə ödəniləcək. Saziş qüvvəyə mindikdə, 1996-cı il mayın 27-də Bakıda imzalanmış əvvəlki saziş qüvvəsini itirəcək. Hər iki qanun layihəsi müzakirələrdən sonra səsverməyə qoyularaq bir oxunuşda qəbul edilib.