Azərbaycanda internet alış-verişlərinin ödəniş qaydaları dəyişdiriləcək

Azərbaycanda elektron ticarətlə məşğul olan satıcıların alıcılara POS-terminallar, elektron pul kisələri və digər vasitələrlə nağdsız ödənişlər barədə məlumat verməsi nəzərdə tutulur. Day.az, Trend-ə istinadən bildirib ki, bu müddəa Milli Məclisin plenar iclasında müzakirə olunan “Elektron ticarət haqqında” Qanuna dəyişiklik layihəsində əks olunub.

Layihəyə görə, satıcı (təchizatçı) alıcılara (sifarişçilərə) və səlahiyyətli dövlət orqanlarına ödəniş üsulları haqqında məlumata çıxış imkanı yaratmalıdır. Nağdsız ödənişlər ödəniş xidməti göstərənlər vasitəsilə həyata keçiriləcək. Layihə texnoloji neytrallıq prinsipinə əsaslanacaq və yalnız ölkə ərazisində həyata keçirilən elektron ticarəti şamil edən müddəa ləğv ediləcək.

Müzakirədən sonra layihə səsverməyə çıxarılıb və birinci oxunuşda qəbul edilib.