Банктер мемлекеттік жәрдемақы алушылардың шот және депозит деректерін береді

Қазақстанда 2027 жылғы 1 қаңтардан бастап екінші деңгейдегі банктер мемлекеттік көмек алуға өтініш берген отбасылардың әл-ауқатын бағалау үшін қажетті мәліметтерді Еңбек және халықты әлеуметтік қорғау министрлігіне бере бастайды. Бұл туралы құрылтайдың отырысында ведомство басшысы Әскербек Ертаев мәлімдеді. Ақпаратты Kapital.kz бизнес-ақпарат орталығының тілшісі жеткізді.

Шот және депозит туралы мәліметтер жәрдемақы алушының және оның отбасы мүшелерінің келісімімен беріледі. Алынған деректер үй шаруашылығының шынымен мемлекеттік қолдауға мұқтаж екенін нақтырақ анықтау үшін пайдаланылады. Жаңа тетікке сәйкес жәрдемақы тағайындағанда тек ресми табыс пен мүлік ғана емес, отбасының нақты қаржылық жағдайын көрсететін басқа көрсеткіштер де ескеріледі.

Негізгі құрал әртүрлі мемлекеттік ақпараттық жүйелерден деректерді біріктіретін цифрлық отбасы картасы болады. Министрдің айтуынша, карта үй шаруашылықтарын 8 негізгі бағыт бойынша және 50-ден астам көрсеткіш арқылы бағалайды. Кешенді бағалау ай сайын жүргізіледі. Премьер-министр Өлжас Бектенов құрылтайда келтірген есептеулерге сүйенсек, реформа 2027 жылы 700 млрд теңге үнемдеуге мүмкіндік береді, ал үш жылда босатылатын қаражат көлемі 2,5 трлн теңгеге жетеді.