Астрахань қаласында Қаюм Насыри институтының орталығы ашылды

Астраханьда 15 қазанда «Дуслық» татар ұлттық мәдениеті өңірлік қоғамдық ұйымының базасында Қазан федералдық университетінің Филология және мәдениетаралық байланыстар институтының Қаюм Насыри институтының білім беру-мәдени орталығы ашылды. Бұл туралы Татарстан Республикасы Білім және ғылым министрлігінің баспасөз қызметі хабарлады.

Салтанатты іс-шараға Татарстан Білім және ғылым министрі Ильсур Хадиуллин, КФУ-дың Ғабдулла Тұқай атындағы ұлттық мәдениет және білім беру жоғары мектебінің деканы Рамил Мирзахитов, институттың жалпы тілтану және түркология кафедрасының профессоры, филология ғылымдарының докторы Альфия Йосыпова, тіл және мәдениетаралық байланыстар кафедрасының доценті, филология ғылымдарының кандидаты Ләйсән Хабирова, сондай-ақ Татарстанның Арск, Лаеш және Питрәч аудандарының білім беру саласы өкілдері қатысты.

Орталыққа Астрахань үшін оқулықтар, энциклопедиялар және сөздіктер жеткізіледі. Орталықта татар тілін үйрену бойынша тегін курстар, Қазандағы ұстаздардың татар әдебиеті бойынша дәрістері, ғылыми конференциялар және басқа да білім беру іс-шаралары ұйымдастырылмақ, деп министрлікте мәлімдеді. Институт орталықтары 2014 жылдан бастап Татарстан Республикасының мемлекеттік тілдерін және республикада тұратын басқа халықтардың тілдерін сақтау, оқыту және дамыту жөніндегі мемлекеттік бағдарлама аясында ұйымдастырылуда.