Astraxanda Kayum Nəsiri İnstitutunun mərkəzi açılıb

Astraxanda, “Dostluq” Tatar milli mədəniyyəti regional ictimai təşkilatının bazasında Qazan Federal Universitetinin Filologiya və mədəniyyətlərarası əlaqələr İnstitutunun Kayum Nəsiri İnstitutu təhsil-mədəniyyət mərkəzinin açılış mərasimi keçirilib. Bu barədə Tatarıstan Təhsil və Elm Nazirliyinin mətbuat xidməti məlumat verib.

Mərasimdə Tatarıstanın təhsil və elm naziri İlsur Hadiullin, QFU-nun Qabdulla Tukay adına Milli mədəniyyət və təhsil ali məktəbinin dekanı Ramil Mirzəhitov, İnstitutun ümumi dilçilik və türkologiya kafedrasının professoru, filologiya elmləri doktoru Alfiya Yosıpova, dil və mədəniyyətlərarası əlaqələr kafedrasının dosenti, filologiya elmləri namizədi Leysan Xəbirova, eləcə də Tatarıstanın Arça, Laiş və Pitrəç rayonlarının təhsil sahəsi nümayəndələri iştirak edib.

Mərkəz Astraxana dərsliklər, ensiklopediyalar və lüğətlər ilə təchiz ediləcək. Mərkəzdə tatar dilini öyrənmək üzrə pulsuz kurslar, Qazan müəllimlərinin tatar ədəbiyyatı üzrə mühazirələri, elmi konfranslar və digər təhsil tədbirləri təşkil olunacaq. Nazirlik bildirib ki, İnstitutun mərkəzləri 2014-cü ildən etibarən Tatarıstanın dövlət dillərinin və respublikada yaşayan digər xalqların dillərinin qorunması, öyrənilməsi və inkişafı üzrə dövlət proqramı çərçivəsində yaradılır.