Өзбекстанда көлік-логистикалық орталықтар 2040 жылға дейін салықтан босатылады

Өзбекстан президенті көлік-логистикалық жүйені дамыту бойынша қосымша шаралар туралы қаулы қабылдады, деп хабарлады Әділет министрлігі. Құжатта 2026–2030 жылдарға арналған негізгі нысаналы көрсеткіштер бекітілді. Атап айтқанда, көлік-логистикалық орталықтардың жылдық қуаты кемінде 40 млн тоннаға жеткізіледі, көлік және логистикалық қызметтердің экспорты 3,5 млрд долларға, ал республика аумағы арқылы транзиттік жүк тасымалы 18,5 млн тоннаға жетеді.

Барлық талаптарға сай халықаралық құрғақ порттар саны 24-тен 30-ға өседі. Әндіжан облысының Ханабад қаласы, Бұхара облысының Алат ауданы, Сурхандария облысының Термез ауданы, сондай-ақ Ташкент облысының Янгиюль және Ахангарон аудандары көлік логистикасына маманданады. Орталықтар 2030 жылдың соңына дейін Көлік министрлігінің «E-logistika» платформасына қосылады.

2040 жылға дейін ESCAP құрғақ порттар келісіміне енгізілген, жүйелерді енгізген және «E-logistika» платформасында кемінде «BB» рейтингі бар орталықтар жер және мүлік салығынан толық босатылады. Реестрге енген объектілер үшін 2029 жылдың 1 тамызына дейін республикада шығарылмайтын қойма жабдықтары, тиеу-түсіру техникасы, агрегаттар мен қосалқы бөлшектер кедендік баждан және міндетті сертификаттаудан босатылады.