Oʻzbekistonda transport-logistika markazlari 2040-yilgacha soliqlardan ozod etiladi

Prezident transport-logistika tizimini rivojlantirishga oid qoʻshimcha choralar toʻgʻrisida qaror qabul qildi. Bu haqda Adliya vazirligi xabar berdi. Hujjatda 2026–2030-yillarga moʻljallangan asosiy koʻrsatkichlar tasdiqlandi. Xususan, transport-logistika markazlarining yillik quvvati kamida 40 mln tonnaga yetkaziladi, transport va logistika xizmatlari eksporti 3,5 mlrd dollarga, respublika hududi orqali tranzit yuk tashish esa 18,5 mln tonnaga yetadi.

Xalqaro quruq portlar soni 24 tadan 30 taga oshiriladi. Andijon viloyatining Xonobod shahri, Buxoro viloyatining Olot tumani, Surxondaryo viloyatining Termiz tumani, shuningdek Toshkent viloyatining Yangiyoʻl va Ohangaron tumanlari logistika yoʻnalishiga ixtisoslashadi. Markazlarda terminal va ombor boshqaruv tizimlari joriy etiladi hamda 2030-yil oxirigacha Transport vazirligining «E-logistika» platformasiga ulanadi.

2040-yilgacha ESCAP quruq portlar kelishuviga kiritilgan, koʻrsatilgan tizimlarni joriy etgan va «E-logistika» platformasida kamida «BB» reytingga ega markazlar yer va mulk soliqʻidan toʻliq ozod etiladi. Reyestrga kiritilgan obyektlar uchun 2029-yil 1-avgustgacha respublikada ishlab chiqarilmaydigan ombor jihozlari, yuklash-tushirish texnikasi, agregatlar va ehtiyot qismlar boj va majburiy sertifikatlashtirishdan ozod qilinadi.