Құрылтай үш жылға арналған республикалық бюджет жобасын мақұлдады

Құрылтай депутаттары үш жылға арналған республикалық бюджет жобасын бірінші оқылымда мақұлдады. Egemen.kz хабарлағандай, құжат Мемлекет басшысы алға қойған макроэкономикалық тұрақтылықты сақтауға, барлық әлеуметтік міндеттемелерді орындауға және инфрақұрылымды қарқынды дамытуға бағытталған.

Құрылтайдың баспасөз қызметі жоба бойынша орта мерзімді кезеңде ішкі жалпы өнімнің орташа жылдық өсу қарқыны 5,4% құрайтынын мәлімдеді. Жылдық инфляцияның нысаналы дәлізі 2027 жылы 7,5-9,5% деңгейінде белгіленіп, 2029 жылға қарай 6%-ға дейін төмендейді деп күтілуде. Кезең соңына қарай бюджет тапшылығын ІЖӨ-нің 0,4%-ына дейін қысқарту жоспарланған.

2027 жылы меншікті кірістер 19,9 трлн теңге, трансферттер 5,5 трлн теңге, шығыстар 30,2 трлн теңге көлемінде болжанған. Шығыстардың үштен бірінен астамы ғылым, білім беру және медицина салаларын қолдауға бағытталады. Депутаттар макроэкономикалық болжамдардың дәлдігін арттыру және трансферттерге тәуелділікті азайту қажеттігін атап өтті.