Қазақстанда 2027 жылдан бастап 77 мыңнан астам учаскелік дәрігер мен медбикенің жалақысы өседі

Қазақстанда 2027 жылғы 1 қаңтардан бастап емханалардағы учаскелік қызметтің 77 мыңнан астам қызметкерінің жалақысын арттыру жоспарланып отыр. Денсаулық сақтау министрі Ақмарал Әлназарова үкіметтегі брифингте осы туралы толығырақ айтып берді.

Министрліктің есебі бойынша, бұл қосымша төлемге жылына шамамен 137 миллиард теңге қажет болады. Әлназарова қосымша төлем мөлшері үздіксіз еңбек өтіліне және психоэмоционалдық жүктемеге байланысты болатынын айтты. Министр учаскелік қызмет мамандарының жалақысы 40 пайызға дейін өсуі мүмкін екенін атап өтті.

Министрліктің болжамы бойынша, үлкен еңбек өтілі бар жалпы практика дәрігерінің жалақысы ауылдық жерлерде 760 мың теңгеге, ал қалада 607 мың теңгеге жетуі мүмкін. Отбасылық дәрігерлер бір күнде 40–50 адамға дейін қабылдай алатынын және базалық жалақы көбіне жетпейтінін айтады.