Өзбекстанда энергияны үнөмдөөчү жылытмаканаларга электр чыгымдарынын 50 пайызы төлөнөт

Өзбекстанда энергияны үнөмдөөчү технологияларды колдонгон жылытмакана чарбаларына электр энергиясынын чыгымдарынын бир бөлүгү төлөнүп берилет. Ушуга байланыштуу президенттин тиешелүү токтому кабыл алынды. Документке ылайык, 2026-жылдын 1-ноябрынан 2030-жылдын 1-апрелине чейин жылуулук энергиясын үнөмдөөчү атайын каптоосу же энергия натыйжалуу «жашыл» ысытуу каражаттарын колдонгон жылытмаканаларга октябрь–март айларында колдонулган электр энергиясынын наркынын 50 пайызы өлчөмүндө субсидия бөлүнөт.

Токтом менен айыл чарба товарларын өндүрүүчүлөр үчүн кошумча нарк салыгынын ставкасы нөл пайыз деп белгиленди. Жылытмаканадан алынган кирешеси жалпы кирешесинин кеминде 60 пайызын түзгөн чарбалар үчүн 2026–2029-жылдары социалдык салыктын ставкасы 1 пайыз деп белгиленди. 2027–2030-жылдары ушул талапка жооп берген ишкердик субъектилер үчүн жер салыгы менен мүлк салыгынын ставкалары 50 пайызга азайтылат.

Энергия натыйжалуулугунун улуттук агенттиги 2030-жылга чейин Ташкент облусунун Ташкент, Зангиота, Кибрай, Янгиюл жана Жогорку Чирчик райондорундагы жеке короолордогу жылытмаканаларды энергияны үнөмдөөчү технологиялар менен жабдууну колдойт. Күн панелдерин, жылуулук насосторун жана башка жабдууларды сатып алуу жана орнотуу чыгымдарынын 40 пайызы, бирок 100 млн сумдан ашпаган бөлүгү бир жолку субсидия катары төлөнөт. Үй-бүлөлүк ишкердүүлүк алкагында «жашыл» жылытмакана үчүн 300 млн сумга чейин, бар жылытмаканаларды кайра жабдуу үчүн 150 млн сумга чейин жеңилдетилген кредит берилет. Президенттин төрагалыгы менен 13-октябрда өткөн жыйында Ташкентке жанаша беш райондогу жылытмаканалар үчүн атайын экологиялык тартип киргизилери айтылды.