Oʻzbekistonda energiya tejamkor issiqxonalarga elektr xarajatlarining 50 foizi qoplab beriladi

Oʻzbekistonda energiya tejamkor texnologiyalardan foydalanuvchi issiqxona xoʻjaliklariga elektr energiyasi xarajatlarining bir qismi qoplab beriladi. Bu boʻyicha prezidentning tegishli qarori qabul qilindi. Hujjatga koʻra, 2026-yil 1-noyabrdan 2030-yil 1-aprelgacha issiqlik energiyasini tejovchi maxsus qoplama yoki “yashil” isitish vositalaridan foydalanuvchi issiqxonalarga oktyabr–mart oylarida isteʼmol qilingan elektr energiyasi qiymatining 50 foizi miqdorida subsidiya ajratiladi.

Qaror bilan qishloq xoʻjaligi tovar ishlab chiqaruvchilari uchun qoʻshilgan qiymat soligʻi stavkasi nol foiz etib belgilandi. Issiqxona faoliyatidan olingan daromadi jami daromadning kamida 60 foizini tashkil etgan xoʻjaliklar uchun 2026–2029-yillarda ijtimoiy soliq stavkasi 1 foiz etib belgilandi. 2027–2030-yillarda shu talabga javob beradigan tadbirkorlik subyektlari uchun yer soligʻi va mol-mulk soligʻi stavkalari 50 foizga kamaytiriladi.

Energiya samaradorligi milliy agentligi 2030-yilgacha Toshkent viloyatining Toshkent, Zangiota, Qibray, Yangiyoʻl va Yuqori Chirchiq tumanlarida aholi tomorqalaridagi issiqxonalarni energiya tejamkor texnologiyalar bilan jihozlashni qoʻllab-quvvatlaydi. Quyosh panellari, issiqlik nasoslari va boshqa uskunalarni xarid qilish hamda oʻrnatish xarajatlarining 40 foizi, biroq 100 mln soʻmdan oshmagan qismi bir martalik subsidiya sifatida qoplanadi. Oilaviy tadbirkorlik doirasida “yashil” issiqxona uchun 300 mln soʻmgacha, mavjud issiqxonalarni qayta jihozlash uchun 150 mln soʻmgacha imtiyozli kredit beriladi. Prezident raisligida 13-oktyabr kuni oʻtkazilgan yigʻilishda Toshkentga tutash beshta tumandagi issiqxonalar uchun maxsus ekologik tartib joriy etilishi aytilgan.