Өзбекстанда энергия үнемдейтін жылыжайлар үшін электр шығындарының 50 пайызы өтеледі

Өзбекстанда энергияны үнемдейтін технологияларды пайдаланатын жылыжай шаруашылықтарына электр энергиясы шығындарының бір бөлігі өтеледі. Бұл бойынша президенттің тиісті қаулысы қабылданды. Құжатқа сәйкес, 2026 жылғы 1 қарашадан 2030 жылғы 1 сәуірге дейін жылу энергиясын үнемдейтін арнайы жабын немесе энергия тиімді «жасыл» жылыту құралдарын пайдаланатын жылыжайларға қазан–наурыз айларында тұтынылған электр энергиясы құнының 50 пайызы мөлшерінде субсидия бөлінеді.

Қаулымен ауыл шаруашылығы тауар өндірушілері үшін қосылған құн салығының мөлшерлемесі нөл пайыз етіп белгіленді. Жылыжай қызметінен түскен табысы жалпы табысының кемінде 60 пайызын құрайтын шаруашылықтар үшін 2026–2029 жылдары әлеуметтік салық мөлшерлемесі 1 пайыз етіп белгіленді. 2027–2030 жылдары осы талапқа сәйкес келетін кәсіпкерлік субъектілері үшін жер салығы мен мүлік салығының мөлшерлемелері 50 пайызға азайтылады.

Энергия тиімділігі ұлттық агенттігі 2030 жылға дейін Ташкент облысының Ташкент, Зангиота, Қибрай, Янгиюль және Жоғарғы Чирчик аудандарындағы үй жанындағы жылыжайларды энергияны үнемдейтін технологиялармен жабдықтауды қолдайды. Күн панельдерін, жылу сорғыларын және басқа жабдықтарды сатып алу мен орнату шығындарының 40 пайызы, бірақ 100 млн сомнан аспайтын бөлігі бір реттік субсидия ретінде өтеледі. Отбасылық кәсіпкерлік аясында «жасыл» жылыжай үшін 300 млн сомға дейін, бар жылыжайларды қайта жабдықтау үшін 150 млн сомға дейін жеңілдікті несие беріледі. 13 қазанда президенттің төрағалығымен өткен жиында Ташкентке іргелес бес ауданда жылыжайлар үшін арнайы экологиялық тәртіп енгізілетіні айтылды.