Özbəkistanda enerji qənaətcil istixanalara elektrik xərclərinin 50 faizi ödəniləcək

Özbəkistanda enerji qənaətcil texnologiyalardan istifadə edən istixana təsərrüfatlarına elektrik enerjisi xərclərinin bir hissəsi ödəniləcək. Bu barədə prezidentin müvafiq fərmanı qəbul edilib. Sənədə görə, 2026-cı il 1 noyabrdan 2030-cu il 1 aprelə qədər istilik enerjisini qoruyan xüsusi örtük və ya “yaşıl” isitmə vasitələrindən istifadə edən istixanalara oktyabr–mart aylarında istehlak edilən elektrik enerjisinin dəyərinin 50 faizi həcmində subsidiya ayrılacaq.

Fərmanla kənd təsərrüfatı məhsulu istehsalçıları üçün ƏDV dərəcəsi sıfır faiz müəyyən edilib. Ümumi gəlirinin ən azı 60 faizini istixana fəaliyyətindən əldə edən təsərrüfatlar üçün 2026–2029-cu illərdə sosial vergi dərəcəsi 1 faiz təyin edilib. 2027–2030-cu illərdə həmin tələbə cavab verən sahibkarlıq subyektləri üçün torpaq və əmlak vergisi dərəcələri 50 faiz azaldılacaq.

Milli Enerji Səmərəliliyi Agentliyi 2030-cu ilə qədər Toşkənd vilayətinin Toşkənd, Zəngiota, Qibray, Yangiyo'l və Yuxarı Çirçik rayonlarında əhali həyətyanı istixanaların enerji qənaətcil texnologiyalarla təchizini dəstəkləyəcək. Günəş panelləri, istilik nasosları və digər avadanlıqların alınması və quraşdırılması xərclərinin 40 faizi, lakin 100 milyon somdan çox olmayan hissəsi birdəfəlik subsidiya kimi ödəniləcək. Ailə sahibkarlığı çərçivəsində “yaşıl” istixana üçün 300 milyon somadək, mövcud istixanaların yenidən təchizi üçün 150 milyon somadək güzəştli kredit veriləcək. Prezidentin sədrliyi ilə 13 oktyabrda keçirilən iclasda Toşkəndə bitişik beş rayonda istixanalar üçün xüsusi ekoloji qaydanın tətbiq ediləcəyi bildirilib.