Орто коридор: Өзбекстан Европа менен Азиянын ортосунда маанилүү транспорттук буун боло алабы?

Транскаспий эл аралык транспорт маршруту, башкача айтканда Орто коридор Азия менен Европанын ортосундагы соода мамилелеринде барган сайын маанилүү роль ойноп жатат. Дүйнөлүк банктын 28-сентябрда жарыяланган отчетуна ылайык, зарыл инфраструктурага инвестиция салынып, реформалар ишке ашырылса, коридор боюнча жүк ташуу көлөмү үч эседен ашык өсүшү, жеткирүү убактысы эки эсе кыскарышы мүмкүн.

Отчетто айтылышынча, маршрут боюндагы тогуз өлкөнүн ИДПсы 3,3 пайызга өсүшү жана 2040-жылга чейин 2 миллион жаңы жумуш орду түзүлүшү күтүлүүдө. Темир жолдорго, портторго жана автожолдорго 25 миллиард доллардан ашык, логистикалык борборлорго, терминалдарга, жылма курамга жана санариптик системаларга болжол менен 30 миллиард доллар керек. Өзбекстандын ИДПсы 749 миллион долларга өсүшү мүмкүн; басымдуу милдеттерге жаңы темир жол багыттары, Ташкент, Самарканд жана Навоидеги кургак порттор жана жылма курамды жаңыртуу кирет.

Ташкентте өткөн Транскаспий коридору боюнча экинчи улуттук конференцияда транспорт министри Илхом Махкамов Өзбекстан Европа Бирлиги жана эл аралык финансылык институттар менен бирге басымдуу долбоорлорду даярдап жатканын айтты. Анын сөзүнө караганда, өлкөнүн 27 транспорттук-логистикалык борборунун 24ү ЭСКАТОнун кургак порттор тизмесине киргизилген. Өзбекстандагы Европа Бирлигинин элчиси Тойво Клаар эл аралык ташуу эрежелерин координациялоонун зарылдыгын баса белгиледи.