Oʻrta koridor: Oʻzbekiston Yevropa va Osiyo oʻrtasida muhim transport boʻgʻini boʻla oladimi?

Transkaspiy xalqaro transport yoʻnalishi, yaʼni Oʻrta koridor Osiyo va Yevropa oʻrtasidagi savdo aloqalarida tobora muhim ahamiyat kasb etmoqda. Jahon banki 28 sentyabrda eʼlon qilgan hisobotiga koʻra, zarur infratuzilma investitsiyalari va islohotlar amalga oshirilsa, koridordagi yuk tashish hajmi uch baravardan ortiq oshishi, yetkazib berish muddati esa ikki baravar qisqarishi mumkin.

Hisobotga koʻra, yoʻnalish boʻylab joylashgan toʻqqiz davlatning yalpi ichki mahsuloti 3,3 foizga oshishi va 2040-yilgacha 2 million qoʻshimcha ish oʻrni yaratilishi kutilmoqda. Buning uchun temir yoʻllar, portlar va avtomobil yoʻllariga 25 milliard dollardan ortiq, logistika markazlari va raqamli tizimlarga esa qariyb 30 milliard dollar investitsiya kerak. Oʻzbekiston YaIMi 749 million dollarga oshishi mumkin.

Toshkentda oʻtkazilgan ikkinchi milliy konferensiyada transport vaziri Ilhom Maxkamov Oʻzbekiston Yevropa Ittifoqi va xalqaro moliya institutlari bilan birgalikda ustuvor loyihalar tayyorlayotganini aytdi. Vazir 27 ta logistika markazidan 24 tasi ESCAP quruq portlari roʻyxatiga kiritilganini va temir yoʻl tashishlarda 70 foizli chegirmalar joriy etilganini qayd etdi. Yevropa Ittifoqining Oʻzbekistondagi elchisi Toivo Klaar esa xalqaro yuk tashish qoidalarini muvofiqlashtirish zarurligini taʼkidladi.