Özbəkistanda banklar və notariuslar kağız sənəd yerinə elektron sənəd qəbul edəcək

Özbəkistanda bir sıra xidmətlərin alınması zamanı vətəndaşlar kağız sənəd surətləri əvəzinə sənədlərin elektron versiyalarını təqdim edə biləcəklər. Bunu Ədliyyə Nazirliyi açıqlayıb. Müvafiq departament sənədləri oktyabrın 20-də qeydiyyatdan keçib və onların əsasında 33 departament sənədinə dəyişiklik və əlavələr edilib.

Biometrik pasportun, ID-kartın, doğum və nikah şəhadətnamələrinin, pensiya vəsiqəsinin, əlillik arayışının, müharibə iştirakçısı vəsiqələrinin və tələbə vəsiqəsinin elektron versiyaları my.gov.uz portalı və Ijtimoiy karta mobil tətbiqi vasitəsilə təqdim oluna biləcək. Elektron sənədlər bank xidmətləri və bəzi maliyyə əməliyyatlarında şəxsiyyətin təsdiqi, notariat hərəkətləri, daxili aviareyslərə qeydiyyat, müharibə iştirakçılarına kompensasiyaların ödənilməsi və telekommunikasiya xidmətləri müqavilələri zamanı qəbul ediləcək.

Həmçinin qan və onun komponentlərinin donorlarının şəxsiyyətinin təsdiqi, lombardlarla müqavilələr, sosial-tibbi müəssisələrdə ödənişli xidmətlər və hərbi uçota alınma zamanı istifadə olunacaq. Elektron sənədlər digər bir sıra xidmətlərin alınmasında da istifadə edilə biləcək.