Эрдоган Жапаровго Кыргызстандагы президенттик шайлоонун ийгиликтүү өтүшүн каалады

Кыргызстандын Президенти Садыр Жапаров 30-октябрда Анкарада Түркиянын Президенти Режеп Тайып Эрдоган менен сүйлөшүү жүргүзгөн. Мамлекет башчысынын администрациясынын басма сөз кызматынын маалыматына ылайык, тараптар эки тараптуу кызматташтыктын актуалдуу маселелерин жана кыргыз-түрк мамилелерин андан ары чыңдоонун келечегин талкуулашкан.

Жапаров түрк тарапынын жылуу тосуп алуусу жана Түрк мамлекеттеринин уюмунун саммитин жогорку деңгээлде уюштургандыгы үчүн ыраазычылык билдирип, түрк элин Республика күнү менен куттуктаган. Ал Кыргызстандын Түркия менен h-ар тараптуу стратегиялык өнөктөштүктү андан ары бекемдөөгө кызыкдар экенин баса белгилеген.

Түрк маалымат каражаттарынын кабарлашынча, Эрдоган эки өлкөнүн соода жана инвестициялык потенциалын ишке ашыруу үчүн чаралар көрүү зарылдыгын, ошондой эле коргонуу өнөр жайы жана энергетика тармагындагы кызматташтыктын маанисин белгилеген. Ал Түрк мамлекеттеринин уюму жаңы мезгилде чечкиндүү кадамдарды жасай турганына ишеним билдирген. Эрдоган Жапаровду ноябрда Анталияда өтүүчү COP31 дүйнөлүк лидерлеринин саммитине чакырып, Кыргызстанда 27-январга пландалган президенттик шайлоонун ийгиликтүү өтүшүн каалаган.