Азербайжандын 2027-жылга арналган мамлекеттик бюджети Милли Меджлисте талкууга алынат

Азербайжандын Милли Меджлисинде «Азербайжан Республикасынын 2027-жылга арналган мамлекеттик бюджети жөнүндө» мыйзам долбоорун талкуулоо башталат. Trend агенттигинин маалыматына ылайык, мыйзам долбоору 4-ноябрда парламенттин экономикалык саясат, өнөр жай жана ишкердик комитетинде талкууга чыгарылат.

Долбоорго ылайык, мамлекеттик бюджеттин кирешелери 39 млрд 254 млн манат, чыгашалары 42 млрд 400 млн манат деп пландалууда. 3 млрд 146 млн манаттык тартыштык жекелештирүүдөн жана башка булактардан түшүүчү каражаттар, ички жана тышкы карыздар, ошондой эле 2027-жылдын 1-январына бюджеттин бош калдыгы эсебинен каржыланат. Кирешенин эң чоң булактары: кошулган нарк салыгы (9 млрд 386 млн манат), юридикалык жактардын пайда салыгы (6 млрд 983 млн манат) жана жеке жактардын киреше салыгы (3 млрд 70 млн манат).

Чыгашалардын ичинен экономикалык ишмердүүлүккө 8 907,3 млн манат, коргоого жана улуттук коопсуздукка 8 816,4 млн манат, билимге 5 099 млн манат, социалдык коргоого жана социалдык камсыздоого 4 914 млн манат, саламаттык сактоого 2 084,1 млн манат бөлүнүшү каралган.