Azərbaycanın 2027-ci il dövlət büdcəsi Milli Məclisdə müzakirəyə çıxarılır

Milli Məclisdə “Azərbaycan Respublikasının 2027-ci il dövlət büdcəsi haqqında” qanun layihəsinin müzakirəsinə başlanılır. Trend xəbər verir ki, layihə noyabrın 4-də parlamentin İqtisadi siyasət, sənaye və sahibkarlıq komitəsində müzakirəyə çıxarılacaq.

Layihəyə görə, dövlət büdcəsinin gəlirləri 39 milyard 254 milyon manat, xərcləri isə 42 milyard 400 milyon manat nəzərdə tutulur. 3 milyard 146 milyon manatlıq kəsir özəlləşdirmədən və digər mənbələrdən daxilolmalar, daxili və xarici borclanma hesabına, eləcə də 2027-ci il yanvarın 1-nə mövcud olacaq sərbəst qalıq hesabına maliyyələşdiriləcək. Ən böyük gəlir payı əlavə dəyər vergisi (9 milyard 386 milyon manat), hüquqi şəxslərin mənfəət vergisi (6 milyard 983 milyon manat) və fiziki şəxslərin gəlir vergisidir (3 milyard 70 milyon manat).

Xərclərdə iqtisadi fəaliyyətə 8 milyard 907,3 milyon manat, müdafiə və milli təhlükəsizliyə 8 milyard 816,4 milyon manat, təhsilə 5 milyard 99 milyon manat, sosial müdafiə və sosial təminata 4 milyard 914 milyon manat, səhiyyəyə isə 2 milyard 84,1 milyon manat ayrılması nəzərdə tutulur.