Oʻzbekistonda dori narxlariga yangi tartib va qatʼiy nazorat

Oʻzbekistonda dori narxlarini shakllantirish va nazorat qilish boʻyicha yangi qoidalar joriy etilmoqda, deb xabar bermoqda UzA. Prezident Shavkat Mirziyoyevning 2025 yil 28 yanvardagi farmoni asossiz qimmatlashuvning oldini olish, aholi dori-darmon xarajatlarini kamaytirish va shaffof raqobatni taʼminlashga qaratilgan.

Referent narx tizimiga koʻra, retsept bilan beriladigan dorilarga ulgurji savdoda 15, chakana savdoda 20 foizdan ortiq ustama qoʻyilmaydi va yakuniy sotuv narxi referent narxdan oshmaydi. Bir xil tarkibli, turli savdo nomlari ostidagi preparatlarga eng past referent narx qoʻllaniladi.

Sogʻliqni saqlash vazirligi huzuridagi agentlik maʼlumotiga koʻra, 2026 yil 1 martdan boshlab qariyb 2 ming retsept boʻyicha beriladigan preparatning chakana narxi pasaytirildi. Farmatsevtika mahsulotlari xavfsizligi markazi direktori Alisher Temirov yilning birinchi yarmida 634 ta nazorat tadbiri oʻtkazilganini, 33 ta dorixonaning litsenziyasi bekor qilinganini, ulardan 6 tasi esa dorilarni belgilangan narxdan qimmat sotgani uchun ekanini aytdi.