Oʻzbekistonda sovuq kunlarda metan zapravkalar faoliyati cheklanishi mumkin

Oʻzbekistonda havo haroratining keskin pasayishi munosabati bilan avtomobillarga gaz toʻldiruvchi kompressor shoxobchalari (metan zapravkalar) faoliyati vaqtincha cheklanishi mumkin. Bu haqda Energetika vazirligi xabar berdi.

Vazirlik maʼlumotiga koʻra, sovuq kunlarda gaz taʼminotida aholi xonadonlari, maktablar, bogʻchalar, shifoxonalar va boshqa ijtimoiy obyektlarga ustuvorlik beriladi. Zarurat tugʻilsa, mavsumiy isteʼmolchilar, jumladan, metan zapravkalar faoliyatiga vaqtinchalik cheklovlar kiritilishi mumkin. Bunday cheklovlar mahalliy hokimliklar bilan kelishilgan va tasdiqlangan grafiklar asosida amalga oshiriladi, isteʼmolchilar oldindan ogohlantiriladi.

Vazirlik va tizim tashkilotlari energiya resurslari bilan barqaror taʼminlash choralarini koʻrayotgani, Toshkent va boshqa hududlarda isitish mavsumini boshlash ishlari olib borilayotgani bildirildi. Gaz taʼminoti boʻyicha muammolar uchun 1104, gaz avariyalari uchun 104, elektr uzilishlari uchun esa 1154 qisqa raqamlariga murojaat qilish mumkin. “Oʻzgidromet” maʼlumotlariga koʻra, 9–12-noyabr kunlari Oʻzbekistonga sovuq va nam havo massalari kirib kelishi kutilmoqda. Koʻplab hududlarda yomgʻir, shimoliy va togʻli hududlarda esa qor yogʻishi mumkin.