Özbəkistanda soyuq günlərdə metan doldurma məntəqələrinin fəaliyyəti məhdudlaşdırıla bilər

Özbəkistanda havanın temperaturunun kəskin düşməsi ilə əlaqədar, avtomobillərə qaz dolduran kompressor məntəqələrinin (metan doldurma məntəqələri) fəaliyyəti müvəqqəti məhdudlaşdırıla bilər. Bu barədə Energetika Nazirliyi məlumat verib.

Nazirliyin bildirdiyinə görə, soyuq günlərdə qaz təchizatında prioritet yaşayış evlərinə, məktəblərə, uşaq bağçalarına, xəstəxanalara və digər sosial obyektlərə veriləcək. Zərurət yarandıqda mövsümi istehlakçılara, o cümlədən metan doldurma məntəqələrinə müvəqqəti məhdudiyyətlər tətbiq oluna bilər. Bu məhdudiyyətlər yerli hakimiyyətlərlə razılaşdırılmış və təsdiq edilmiş qrafiklər əsasında həyata keçiriləcək, istehlakçılar əvvəlcədən xəbərdar ediləcək.

Nazirlik və sistem təşkilatlarının enerji resursları ilə davamlı təminat üçün tədbirlər gördüyü, Daşkənd və digər bölgələrdə isitmə mövsümünün başlanması üzrə işlərin davam etdiyi bildirilib. Qaz təchizatı ilə bağlı problemlər üzrə 1104, qaz qəzaları zamanı 104, elektrik kəsintiləri üzrə isə 1154 qısa nömrələrinə müraciət etmək olar. «Özgidromet»in məlumatına görə, noyabrın 9–12-də Özbəkistana soyuq və nəm hava kütlələrinin daxil olacağı gözlənilir; bir çox bölgədə yağış, şimal və dağlıq ərazilərdə isə qar yağa bilər.