Oʻzbekiston elektr tarmoqlarini modernizatsiya qilish uchun OTBdan 200 mln dollar qarz oladi

Osiyo taraqqiyot banki (OTB) Oʻzbekistonning elektr tarmoqlarini modernizatsiya qilish uchun 200 mln dollarlik qarz bitimini imzoladi. Bu haqda bank matbuot xizmati xabar berdi. Bitim 15-oktyabr kuni Tailandning Bangkok shahrida OTB prezidenti Masato Kanda hamda Oʻzbekiston bosh vazirining oʻrinbosari, iqtisodiyot va moliya vaziri Jamshid Qoʻchqorov tomonidan imzolangan.

Ajratiladigan mablagʻlar elektr energiyasini taqsimlash tizimini modernizatsiya qilish, tarmoqlardagi yoʻqotishlarni kamaytirish va elektr taʼminoti ishonchliligini oshirishga yoʻnaltiriladi. Dastur doirasida Oʻzbekiston boʻylab 60 ta elektr taqsimlash podstansiyasi rekonstruksiya va modernizatsiya qilinadi, shuningdek raqamli boshqaruv tizimlari joriy etiladi. Kutilishicha, bu ishlar transformatorlardagi ortiqcha yuklamani kamaytiradi, tarmoqqa kamida 3,3 gigavatt qayta tiklanuvchi energiya manbalarini ulash imkonini beradi va issiqxona gazlari chiqindilarini yiliga qariyb 23 ming tonna karbonat angidrid ekvivalentiga qisqartiradi.

OTB maʼlumotlariga koʻra, iqtisodiyotning rivojlanishi, shaharlarning kengayishi va aholi elektr energiyasi isteʼmolining ortishi tarmoqlarga tushadigan yuklamani oshirmoqda, eskirgan infratuzilma va yoʻqotishlar esa barqaror taʼminotni qiyinlashtirmoqda. Jahon banki rahbariyati oktabr oyi oxirigacha qoʻshimcha 100 mln dollar ajratish taklifini Direktorlar kengashi tasdigʻiga kiritishi kutilmoqda. OTB 2010-yildan buyon Oʻzbekiston energetika sohasiga jami 3,4 mlrd dollardan ortiq moliyalashtirish va kafolatlar taqdim etgan.