Özbəkistan elektrik şəbəkələrini modernləşdirmək üçün AİB-dən 200 milyon dollar borc alır

Asiya İnkişaf Bankı (AİB) elektrik şəbəkələrini modernləşdirmək məqsədilə Özbəkistanla 200 milyon dollarlıq borc sazişi imzalayıb. Bankın mətbuat xidməti bu barədə məlumat verib. Saziş oktyabrın 15-də Tailandın Benkok şəhərində AİB-in prezidenti Masato Kanda və Özbəkistan Baş nazirinin müavini, iqtisadiyyat və maliyyə naziri Camşid Qoçqarov tərəfindən imzalanıb.

Vəsaitlər elektrik enerjisinin paylama sisteminin modernləşdirilməsinə, şəbəkələrdəki itkilərin azaldılmasına və elektrik təchizatının etibarlılığının artırılmasına yönəldiləcək. Proqram çərçivəsində Özbəkistan üzrə 60 paylama yarımstansiyası yenidən qurulacaq və modernləşdiriləcək, habelə rəqəmsal idarəetmə sistemləri tətbiq olunacaq. Gözlənilir ki, bu işlər transformatorlara düşən artıq yükü azaldacaq, şəbəkəyə ən azı 3,3 qiqavat bərpa olunan enerji mənbəyinin qoşulmasına imkan verəcək və istixana qazlarının emissiyasını ildə təxminən 23 min ton karbon dioksid ekvivalentinə qədər azaldacaq.

AİB məlumatına görə, iqtisadi inkişaf, şəhərlərin genişlənməsi və əhalinin elektrik enerjisi istehlakının artması şəbəkələrə düşən yükü artırır, köhnəlmiş infrastruktur və enerji itkiləri isə sabit təchizatı çətinləşdirir. Dünya Bankının rəhbərliyinin oktyabr ayının sonuna qədər əlavə 100 milyon dollar ayrılması təklifini Direktorlar Şurasının təsdiqinə təqdim etməsi gözlənilir. AİB 2010-cu ildən bəri Özbəkistanın enerji sektoruna cəmi 3,4 milyard dollardan çox maliyyələşdirmə və zəmanət təqdim edib.