Qozogʻistonda ijtimoiy toʻlovlarning 14 turiga oʻzgartirish kiritiladi

Qozogʻiston Bosh vaziri Oljas Bektenov mehnat va aholini ijtimoiy himoya qilish sohasini raqamlashtirish masalalari boʻyicha maslahat oʻtkazdi. Egemen Qazaqstan hukumat matbuot xizmatiga tayanib xabar berganiga koʻra, yigʻilishda davlat yordamining haqiqatan muhtoj fuqarolarga yetishi va korxonalarda mehnat huquqlariga rioya etilishi uchun raqamli yechimlar koʻrib chiqildi.

Mehnat va aholini ijtimoiy himoya vaziri Asqarbek Yertayev hamda vitse-vazir Baxtiyor Jazikpayev asosiy raqamli yechimlarni taqdim etdi. «Oilaning raqamli xaritasi» axborot tizimida 30 dan ortiq davlat axborot tizimidan olingan, 20 milliondan ortiq fuqaro va 6,2 million xoʻjalikka oid maʼlumotlar birlashtirilgan. Vazirlik maʼlumotiga koʻra, 2025-yilda 480 355 muhtoj oilaning turmush sharoiti yaxshilangan.

Yuqori daromadli fuqarolarga nisbatan oʻzgarishlar ijtimoiy yordamning 36 turidan faqat 14 tasiga taalluqli boʻladi, qolgan 22 tur boʻyicha joriy toʻlov mexanizmlari saqlanadi. SMS xabarlar yuborilgandan soʻng 200 dan ortiq fuqaro yordamdan voz kechganini maʼlum qilgan. Shuningdek, 66 ta ijtimoiy yordam chorasi qayta koʻrib chiqildi.