Қазақстанда әлеуметтік төлемдердің 14 түріне өзгеріс енгізіледі

Қазақстанның Премьер-министрі Олжас Бектенов еңбек және халықты әлеуметтік қорғау саласын цифрландыру мәселелері бойынша кеңес өткізді. Egemen Qazaqstan Үкімет баспасөз қызметіне сілтеме жасап хабарлағандай, жиында мемлекеттік әлеуметтік көмектің шын мәнінде мұқтаж азаматтарға жетуі және кәсіпорындардағы еңбек құқықтарының сақталуы үшін цифрлық шешімдер қаралды.

Еңбек және халықты әлеуметтік қорғау министрі Асқарбек Ертаев пен вице-министр Бахтияр Жазықпаев негізгі цифрлық шешімдерді таныстырды. «Отбасының цифрлық картасы» ақпараттық жүйесінде 30-дан астам мемлекеттік ақпараттық жүйеден алынған, 20 млн-нан астам азамат пен 6,2 млн үй шаруашылығына қатысты деректер біріктірілген. Министрлік мәліметінше, 2025 жылы 480 355 мұқтаж отбасының өмір сүру жағдайы жақсарған.

Жоғары табысы бар азаматтарға қатысты өзгерістер әлеуметтік жәрдемақылардың 36 түрінің тек 14-іне қатысты болады, қалған 22 түрі бойынша төлем тетіктері өзгеріссіз қалады. SMS-хабарлама жіберілгеннен кейін 200-ден астам азамат жәрдемақыдан бас тартатынын мәлімдеген. Сондай-ақ 66 әлеуметтік көмек шарасына ревизия жүргізілді.