Oʻzbekiston 2030-yilgacha yillik elektr energiyasi ishlab chiqarishni 129 mlrd kVt soatdan oshiradi

Prezident Shavkat Mirziyoyev yoqilgʻi-energetika sohasidagi investorlar bilan ochiq muloqot oʻtkazmoqda. Bu haqda prezident matbuot xizmati xabar berdi. Davlat rahbari energetikani taraqqiyotning yuragi deb atab, barqaror energiya taʼminoti tadbirkorlar sarmoyasi va odamlarning ertangi kunga ishonchi uchun muhimligini taʼkidladi.

Oʻn yil avval sohadagi muammolarni hal qilish, eskirgan quvvatlarni yangilash va oʻsib borayotgan talabni qoplash vazifalari belgilangan edi. Buning uchun energetika bozori xususiy sarmoyaga ochildi, davlat-xususiy sheriklik mexanizmlari joriy etildi. Oʻtgan davrda sohaga 35 milliard dollar investitsiya kiritildi, hamkor davlatlar soni 2-3 tadan 10 tadan ortiqqa yetdi. Quyosh, shamol va gidroelektr stansiyalari hisobiga qayta tiklanuvchi energiyaning jami generatsiyadagi ulushi 31 foizga koʻtarildi. Umumiy qiymati 4,5 milliard dollarlik 6 ta yirik loyiha boʻyicha bitimlar imzolandi; ular doirasida 3 ming megavatt generatsiya va 400 megavatt energiya saqlash quvvati yaratiladi.

2030-yilgacha 22 ming megavatt yangi quvvat yaratish maqsad qilingan. Natijada elektr energiyasi ishlab chiqarishning yillik hajmi 129 mlrd kilovatt-soatdan oshadi, qayta tiklanuvchi energiya ulushi 54 foizga yetadi. Yaqinda imzolangan farmon bilan yoqilgʻi-energetika sohasida davlat va biznesning vazifalari aniq ajratildi. Loyihalar ochiq raqobat, shaffof qoidalar va kelishilgan shartlarning izchil bajarilishi asosida amalga oshiriladi.