Ikkinchi va uchinchi AESni ham qurish rejalarimiz bor — Shavkat Mirziyoyev

Oʻzbekistonda uchinchi atom elektr stansiyasini qurish rejalashtirilmoqda. Bu haqda Shavkat Mirziyoyev yoqilgʻi-energetika tarmogʻidagi investorlar bilan ochiq muloqotda maʼlum qildi. U yangi hamkorlar bilan ikkinchi AESni qurish boʻyicha investorlar bilan suhbatlashish niyatini aytdi hamda uran ishlab chiqarish oshayotgani va sohada tajriba toʻplanganini taʼkidladi.

Birinchi AES Jizzax viloyatining Forish tumanida qurilmoqda. Stansiyaning umumiy quvvati 2110 MVt, kutilayotgan yillik ishlab chiqarish hajmi 17 mlrd kVt/soatgacha. Loyihaning bazaviy qiymati 9,5 mlrd dollardan oshmasligi baholanmoqda; toʻliq yakunlash 2034–2035 yillarga moʻljallangan.

Shavkat Mirziyoyev ikkinchi AES haqidagi maʼlumotni 17 avgust kuni Xorazm viloyatiga tashrifi chogʻida bergan, ammo uning joylashuvi, quvvati va muddatlari rasman eʼlon qilinmagan. 8 sentyabrda Belgradda boʻlib oʻtgan Oʻzbekiston-Serbiya biznes forumida Serbiya prezidenti Aleksandar Vuchich ikkinchi AESni Xitoy bilan hamkorlikda qurilishini maʼlum qildi.