Ishlab chiqarishdan eksportgacha: energetikada kompleks loyihalarga ustuvorlik beriladi

Prezident Shavkat Mirziyoyev yoqilgʻi-energetika sohasidagi investorlar bilan ochiq muloqot oʻtkazmoqda. Soʻnggi besh yilda elektr tarmoqlarini modernizatsiya qilishga 2 milliard dollardan ortiq yoʻnaltirilgan. Navbatdagi katta vazifa tarmoqlarni yangilash va energiya saqlash tizimlarini rivojlantirishdir.

2030 yilgacha 5 ming kilometr tarmoq va 16 ta yirik podstansiya qurish, energiya saqlash quvvatlarini 4,5 gigavattga yetkazish rejalashtirilgan. Loyihalarning katta qismi Qoraqalpogʻiston, Buxoro, Jizzax, Samarqand, Namangan, Qashqadaryo va Toshkent viloyatlariga toʻgʻri keladi. Bundan buyon ustuvorlik generatsiya, saqlash va tarmoqlarni birgalikda qamrab oladigan kompleks loyihalarga beriladi. Uzoq muddatli energiya saqlash uchun gidroakkumulyatsiya stansiyalarini qurishda ham investorlar bilan hamkorlik qilish rejalashtirilmoqda.

Oʻzbekiston energetikada ichki bozor bilan cheklanmaydi. Ozarbayjon va Qozogʻiston bilan Kaspiy orqali «yashil» energiyani Yevropaga yetkazish loyihasi amaliy bosqichga oʻtmoqda. Afgʻoniston va Janubiy Osiyo bozorlari ham istiqbolli yoʻnalishlar sifatida belgilandi.