Aksa Enerji Toshkent, Sirdaryo va Jizzax viloyatlari elektr tarmoqlarini boshqaradi

Spot xabar berganidek, Prezident Shavkat Mirziyoyev 16 oktabrda yoqilgʻi-energetika sohasi investorlari kengashi aʼzolari bilan bir qator uchrashuvlar oʻtkazdi. Uchrashuvlardan birida Aksa Enerji direktorlar kengashi raisi Jemil Kazanchi bilan Oʻzbekistondagi hamkorlikni kengaytirish masalasi muhokama qilindi. Tomonlar muayyan loyihalar boʻyicha ishlarni tezlashtirishga kelishib oldilar.

Kazanchi Oʻzbekiston 24 telekanaliga bergan intervyusida guruh taqsimlovchi elektr tarmoqlariga investitsiya kiritishni rejalashtirayotganini, maqsad energiya yoʻqotishlarini kamaytirish, tannarxni pasaytirish va samaradorlikni oshirish ekanini aytdi. Uchrashuvda Toshkent, Sirdaryo va Jizzax viloyatlaridagi loyihalar muhokama qilindi. Aksa Enerji Samarqand viloyatida boshlagan elektr tarmoqlarini boshqarish faoliyatini kengaytirish uchun kelgusi hafta ichida ushbu loyihalar boʻyicha kelishuvlarni imzolashni rejalashtirmoqda.

Aksa Enerji Oʻzbekistonda umumiy qiymati 750 million dollar boʻlgan toʻrtta elektr stansiyasini qurgan. Samarqand elektr tarmogʻi davlat-xususiy sheriklik modeli asosida 30 yilga boshqaruvga berilgan, kompaniya modernizatsiya uchun 1 milliard dollar investitsiya kiritishni rejalashtirmoqda. Xususiy sherik birinchi 10 yilda kamida 350 million dollar, dastlabki ikki yilda esa kamida 27 million dollar investitsiya kiritishi kerak. Tarmoqlar davlat mulkida qoladi.