Oʻzbekiston tabiiy gazni chuqur qayta ishlashni kengaytiradi

Oʻzbekiston tabiiy gazdan faqat elektr energiyasi ishlab chiqarish uchun yoqilgʻi sifatida foydalanish oʻrniga, yuqori qoʻshilgan qiymatli mahsulotlar olish maqsadida chuqur qayta ishlashni kengaytirishni rejalashtirmoqda. Davlat rahbari Shavkat Mirziyoyev bu haqda 16-oktabrda yoqilgʻi-energetika sohasi investorlari bilan ochiq muloqotda maʼlum qildi.

Qashqadaryo viloyatidagi sintetik suyuq yoqilgʻi majmuasi yiliga 1,5 million tonnagacha mahsulot ishlab chiqaradi. Buxoro viloyatida polietilen, polipropilen va PET ishlab chiqarishni nazarda tutuvchi MTO loyihasi rejalashtirilgan; Buxoro va Fargʻona neft qayta ishlash zavodlarini modernizatsiya qilish ham koʻzda tutilgan.

Investorlardan zamonaviy texnologiyalarga asoslangan, ekologik talablarga javob beradigan va iqtisodiy asoslangan takliflar kutilmoqda. Loyihalarni tanlashda raqobat, shaffoflik, iqtisodiy samaradorlik va oʻzaro manfaat asosiy mezon boʻladi. Shu bilan birga, Ustyurtda SOCAR va BP bilan oltita investitsiya blokida qidiruv-razvedka ishlari olib borilmoqda, yana 128 blok xorijiy hamkorlar uchun tayyorlangan. Ularning prognoz resurslari 5,8 trillion kubometr gaz va 560 million tonna suyuq uglevodorodlarni tashkil etishi baholanmoqda.