Shavkat Mirziyoyev: ming yil oldin yozilgan Imom Moturidiy asarlari bugun ham dolzarb

Prezident Shavkat Mirziyoyev Samarqand shahridagi Imom Moturidiy memorial majmuasida amalga oshirilgan ishlar bilan tanishdi. Davlat rahbarining qarori bilan oʻtgan yili mamlakatimizda Abu Mansur Moturidiyning tugʻilgan kunining 1155 yilligi keng nishonlandi. Shu munosabat bilan Samarqanddagi Chokardiza qabristoni hududida majmuani qayta qurish va obodonlashtirish ishlari boshlandi.

Umumiy maydoni 10,2 gektar boʻlgan majmuada ziyoratchilar uchun yangi masjid qurildi. Imom Moturidiy va Burhoniddin Margʻinoniy maqbaralari toʻliq qayta tiklandi. Majmua tarkibida ilmiy markaz, kutubxona va muzey yaratildi. Kirish qismida portal, mehmonxonalar va katta avtoturargoh bunyod etilib, mahalliy va xorijiy daraxt koʻchatlari ekildi.

Prezident bu maʼrifiy muassasalarning ahamiyatini alohida taʼkidladi: maqsad buyuk ajdodlarimiz merosini chuqur oʻrganib, uni yoshlarga yetkazishdir. Bugun bu bilimlar bizga juda zarur. Davlat rahbari majmuaga tashrif buyurgan har bir inson Imom Moturidiyning ilmiy va maʼnaviy merosi hamda uning islom olamidagi oʻrni haqida tasavvurga ega boʻlishi kerakligini qayd etdi.