Oʻzbek kompaniyalari AQSh iqtisodiyotiga investitsiya kiritishni boshlamoqda — Mirziyoyev

Shavkat Mirziyoyev oʻzbek kompaniyalari AQSh iqtisodiyotiga investitsiya kiritishni boshlayotganini aytdi. U bu gapni 19-oktabr kuni Samarqandda boʻlib oʻtgan Amerika-Oʻzbek biznes va investitsiya kengashining ikkinchi majlisi ochilishida bildirdi. Prezident matbuot xizmatining xabariga koʻra, tadbirda AQSh Davlat kotibi Marko Rubio, AQSh prezidentining maxsus vakili Sergio Gor hamda yetakchi amerikalik kompaniyalar va banklar vakillari ishtirok etdi.

Mirziyoyevning aytishicha, Oʻzbekistonda Amerika kapitali bilan ishlaydigan yuzlab kompaniya faoliyat koʻrsatadi. Mamlakat ular bilan sanoat, energetika, transport, qishloq xoʻjaligi, taʼlim va yangi texnologiyalar sohalarida hamkorlik qilmoqda. Tomonlar qiymati taxminan 12 mlrd dollar boʻlgan 54 ta kelishuv va istiqbolli tashabbusdan iborat paket tayyorladi. Ustuvor yoʻnalishlar orasida muhim minerallarni qayta ishlash, energetika, maʼlumotlar markazlari, sunʼiy intellekt va raqamli yechimlar hamda taʼlim bor. Oʻzbekiston “plug and play” tamoyiliga oʻtishni rejalashtirmoqda, 2035 yilgacha savdo-investitsiya va texnologik hamkorlik dasturini ishlab chiqish taklif etildi.