Өзбек компаниялары АҚШ экономикасына инвестиция сала бастайды — Мирзиёев

Өзбекстан президенті Шавкат Мирзиёев өзбек компаниялары АҚШ экономикасына инвестиция сала бастағанын мәлімдеді. Ол бұл туралы 19 қазанда Самарқандағы Америка-Өзбек іскерлік және инвестициялық кеңесінің екінші отырысының ашылуында айтты. Президент баспасөз қызметінің хабарлауынша, іс-шараға АҚШ Мемлекеттік хатшысы Марко Рубио, АҚШ президентінің арнайы өкілі Серджио Гор, сондай-ақ жетекші американдық компаниялар мен банктердің өкілдері қатысты.

Мирзиёев Өзбекстанда американдық капиталмен жұмыс істейтін жүздеген компания бар екенін және ел олармен өнеркәсіп, энергетика, көлік, ауыл шаруашылығы, білім беру және жаңа технологиялар салаларында ынтымақтасып жатқанын атап өтті. Тараптар құны шамамен 12 млрд доллар болатын 54 келісім мен перспективалы бастамадан тұратын пакет дайындады. Басым бағыттар қатарында маңызды минералдарды өңдеу, энергетика, деректер орталықтарын құру, жасанды интеллект пен цифрлық шешімдер, сондай-ақ білім беру және кадрлар даярлау бар. Өзбекстан “plug and play” моделіне көшуді жоспарлап отыр. Мирзиёев 2035 жылға дейін сауда-инвестициялық және технологиялық ынтымақтастық бағдарламасын әзірлеуді ұсынды.