Japarov: Qirgʻiziston-Ozarbayjon ittifoqi oʻziga xos xarakterga ega

Qirgʻiziston Prezidenti Sadir Japarov Qirgʻiziston bilan Ozarbayjon oʻrtasidagi ittifoq oʻziga xos xarakterga ega ekanini bildirdi. Ozarbayjon Parlamentining Matbuot va jamoatchilik bilan aloqalar boʻlimi xabariga koʻra, u bu fikrlarini Ozarbayjon Milliy Majlisi spikeri Sahiba Gafarova bilan uchrashuvda bildirgan.

Uchrashuvda savdo va iqtisodiyot, investitsiya, energetika hamda transport sohalarini oʻz ichiga olgan turli yoʻnalishlarda Qirgʻiziston-Ozarbayjon hamkorligini yanada rivojlantirish istiqbollari muhokama qilindi. Japarov ikki davlat oʻrtasida erishilgan kelishuvlar, jumladan, bu yil iyul oyida Ilhom Aliyevning Qirgʻizistonga davlat tashrifi chogʻida imzolangan Ittifoqchilik munosabatlari toʻgʻrisidagi shartnoma ikki tomonlama aloqalarni rivojlantirish uchun muhimligini taʼkidladi.

Gafarova Ozarbayjon Prezidenti Ilhom Aliyevning salomlari va yaxshi tilaklarini Prezident Japarovga yetkazdi. Spiker parlamentlararo aloqalar jumladan, ikki tomonlama munosabatlarning dinamik rivojlanayotganini qayd etib, ikki davlat hamkorligini yanada mustahkamlash muhimligini taʼkidladi.