Жапаров: Қырғызстан мен Әзірбайжан одағы ерекше сипатқа ие

Қырғызстан Президенті Садыр Жапаров Қырғызстан мен Әзірбайжан арасындағы одақтастықтың ерекше сипатқа ие екенін мәлімдеді. Әзірбайжан парламентінің баспасөз және қоғаммен байланыс бөлімінің хабарлауынша, ол бұл пікірін Әзірбайжан Ұлттық Мәжілісінің спикері Сахиба Гафаровамен кездесуде айтқан.

Кездесуде сауда мен экономика, инвестиция, энергетика және көлік салаларын қоса алғанда, қырғыз-әзірбайжан ынтымақтастығын әрі қарай дамыту перспективалары талқыланды. Жапаров одақтастықтың ерекше сипатын атап өтіп, екі ел арасында қол жеткізілген келісімдердің, соның ішінде осы жылдың шілде айында Әзірбайжан Президенті Ильхам Алиевтің Қырғызстанға мемлекеттік сапары кезінде қол қойылған Одақтық қатынастар туралы шарттың екіжақты байланыстарды дамытудағы маңыздылығын көрсетті.

Гафарова Әзірбайжан Президенті Ильхам Алиевтің сәлемдемесі мен жақсы тілектерін Президент Жапаровқа жеткізді. Спикер екіжақты қатынастардың, соның ішінде парламентаралық байланыстардың динамикалық дамып келе жатқанын атап өтіп, екі ел арасындағы ынтымақтастықты одан әрі нығайтудың маңыздылығын айтты.