Qashqadaryoda 69 ta loyiha ishga tushirildi, yana 92 ta obyekt qurilishi boshlandi

Prezident Shavkat Mirziyoyev Qashqadaryo viloyatiga safari davomida yangi loyihalarni ishga tushirish va bir qator obyektlar qurilishini boshlash marosimida ishtirok etdi. Davlat rahbari soʻnggi besh yilda viloyatga 20 trillion soʻm yoʻnaltirilgani va 7 milliard dollar xorijiy investitsiya jalb qilinganini taʼkidladi. Aholi jon boshiga daromad uch barobar oshgan.

Rahbar mahalliy xomashyoni viloyatning oʻzida chuqur qayta ishlash va aholiga munosib daromad manbai yaratish zarurligini aytdi. Shu maqsadda umumiy qiymati 6 milliard dollardan ortiq 161 ta loyiha tayyorlangan. Marosimda 69 ta loyiha foydalanishga topshirildi, yana 92 ta obyektning qurilishi boshlandi.

Loyihalar orasida 28 ta sanoat korxonasida qariyb 7 ming doimiy ish oʻrni yaratilishi, italiyalik Cotonella brendi yiliga 8,5 million dona trikotaj mahsuloti ishlab chiqarishi va Shahrisabzda rossiyalik investorlar bilan 300 million dollarlik teleferik, mehmonxona va changʻi kurortidan iborat majmua qurilishi rejalashtirilgani bor. Prezident 2027-yilni viloyatda zamonaviy sanoat va agrotexnologiyalar rivojlanish yili boʻlishini aytdi.