Sincan metodu pambıqçılıqda yüksək səmərəlilik təmin edir

Prezident Şavkat Mirziyoyev Quzar rayonunda “Qashqadaryo Jingu” müəssisəsinin pambıq sahəsinə baş çəkib. Müəssisə bu bitkini Sincan metodu ilə becərir. Dövlət başçısına toxumun səpilməsi, suvarma və becərmə texnologiyaları barədə məlumat verilib. 2,2 min hektar sahədə toxumlar plyonka altında cüt sıralarla səpilir, suvarma tamamilə damcı suvarma sistemi ilə aparılır.

Plyonka torpaqda nəmliyi və istiliyi saxlayaraq pambığın erkən və bərabər cücərməsini təmin edir. Damcı suvarma sistemi ilə su və gübrə birbaşa bitki köklərinə çatdırılır. Nəticədə su sərfi 30-40 faiz, gübrə sərfi isə təxminən 30 faiz azalır, məhsul ənənəvi üsullarla müqayisədə 10-15 gün tez yetişir. Sahələrdə aqrodronlardan da istifadə olunur.

Ənənəvi üsulla hektardan 30-35 sentner pambıq toplanırsa, Sincan texnologiyası bu göstəricini 60-70 sentnerə qədər artırır. Müəssisənin sahələrində məhsuldarlıq hektardan 55 sentner, ümumi məhsul isə 12,3 min tondur. Çin investisiyaları ilə yaradılmış aqroklaster Kasan, Nişan, Quzar, Kukdalı və Mirişkor rayonlarında 18,3 min hektar sahəni əhatə edir. Layihəyə 128 milyon dollar investisiya qoyulub, 50 iş yeri yaradılıb, ixrac həcmi 8,5 milyon dollardır.