Elektr energiyasi ishlab chiqarish 8,4 foizga oshdi, import 27,2 foizga kamaydi

Oʻzbekistonda 2026-yilning yanvar–sentyabr oylarida elektr energiyasi ishlab chiqarish hajmi oʻtgan yilning mos davriga nisbatan 5,4 milliard kilovatt soat yoki 8,4 foizga oshdi. Bu haqda Energetika vazirligi xabar berdi. Vazirlik maʼlumotlariga koʻra, toʻqqiz oyda jami 69,6 milliard kilovatt-soat elektr energiyasi ishlab chiqarilgan. Shundan 49,1 milliard kilovatt soati issiqlik elektr stansiyalari, 10,5 milliard kilovatt soati yirik quyosh va shamol elektr stansiyalari, 6,6 milliard kilovatt soati esa gidroelektr stansiyalari hissasiga toʻgʻri kelgan.

Yirik quyosh va shamol elektr stansiyalari toʻqqiz oyda 2025-yilning toʻliq yillik ishlab chiqarish hajmiga yetgan. Gidroelektr stansiyalarida esa oʻtgan yil davomida ishlab chiqarilgan 6,5 milliard kilovatt soatlik koʻrsatkich ortda qoldirilgan. Kichik quyosh stansiyalarida 2,5 milliard kilovatt soat elektr energiyasi ishlab chiqarilib, oʻtgan yilgi natijadan 500 million kilovatt-soatga oshgan.

Hisobot davrida elektr energiyasi isteʼmoli 68,1 milliard kilovatt soatni tashkil etgan, bu oʻtgan yilning mos davriga nisbatan 6,3 foizga koʻp. Elektr energiyasi eksporti 21,4 foizga oshib, 3,4 milliard kilovatt-soatga yetgan. Import esa 27,2 foizga kamayib, 1,9 milliard kilovatt-soatni tashkil qilgan. Energetika vazirligi 2026-yil yakuniga qadar 94,6 milliard kilovatt-soat elektr energiyasi ishlab chiqarishni rejalashtirmoqda.