Özbəkistanda elektrik istehsalı 8,4 faiz artıb, idxal 27,2 faiz azalıb

Özbəkistanda 2026-cı ilin yanvar–sentyabr aylarında elektrik enerjisi istehsalı keçən ilin eyni dövrünə nisbətən 5,4 milyard kilovat-saat və ya 8,4 faiz artaraq yüksəlib. Bu barədə Energetika Nazirliyi məlumat verib. Nazirliyin məlumatına görə, doqquz ayda ümumilikdə 69,6 milyard kilovat-saat elektrik enerjisi istehsal edilib. Bunun 49,1 milyard kilovat-saatı istilik elektrik stansiyalarının, 10,5 milyard kilovat-saatı iri günəş və külək elektrik stansiyalarının, 6,6 milyard kilovat-saatı isə hidroelektrik stansiyalarının payına düşüb.

İri günəş və külək elektrik stansiyaları doqquz ayda 2025-ci ilin tam illik istehsal həcminə çatıb. Hidroelektrik stansiyalarda isə keçən il istehsal olunan 6,5 milyard kilovat-saatlıq göstərici geridə qoyulub. Kiçik günəş stansiyalarında 2,5 milyard kilovat-saat elektrik enerjisi istehsal olunub ki, bu da keçən ilki nəticədən 500 milyon kilovat-saat çoxdur.

Hesabat dövründə ölkədə elektrik enerjisi istehlakı 68,1 milyard kilovat-saat olub ki, bu da keçən ilin eyni dövrünə nisbətən 6,3 faiz çoxdur. Elektrik enerjisinin ixracı 21,4 faiz artaraq 3,4 milyard kilovat-saata çatıb, idxal isə 27,2 faiz azalaraq 1,9 milyard kilovat-saat təşkil edib. Nazirlik 2026-cı ilin sonuna qədər 94,6 milyard kilovat-saat elektrik enerjisi istehsalını planlaşdırır.