Turkiy davlatlarning yoshlar siyosatida yangi qadam

Turkiy davlatlar tashkiloti (TDT) aʼzo va kuzatuvchi davlatlarining yoshlar va sport masalalari boʻyicha masʼul vazirlarining 10-yubiley yigʻilishi Qirgʻizistonning Bishkek shahridagi «Ak-Keme» mehmonxonasida boʻlib oʻtdi. Qirgʻiziston Madaniyat, axborot, sport va yoshlar siyosati vaziri Mirbek Mambetaliev raisligidagi tadbirda Oʻzbekiston, Turkiya, Ozarbayjon va Qozogʻiston delegatsiyalari hamda TDT Bosh kotibi oʻrinbosari Nuri Guliyev ishtirok etdi.

Oʻzbekiston delegatsiyasi Yoshlar ishlari agentligi direktori Alisher Saʼdullayev boshchiligida ishtirok etib, qoʻshma yoshlar dasturlari, TDT Yoshlar platformasini rivojlantirish hamda 2027-yilda oʻtkaziladigan yoshlar va sport tadbirlariga tayyorgarlik masalalarini muhokama qildi. 2026-yilda Xiva shahrining Turkiy dunyo yoshlar poytaxti deb eʼtirof etilgani va bu loyiha 2027-yilda Qirgʻiz Respublikasining Manas shahrida oʻtkazilishi maʼlum qilindi. Shuningdek, ekologik bilimlar boʻyicha qoʻshma dastur va ekstremizm hamda radikal mafkuraga qarshi harakatlar rejasi loyihasi muhokama qilindi; takliflar navbatdagi yigʻilishgacha taqdim etiladi.