Oʻzbekiston Prezidenti Yevrosiyo iqtisodiy komissiyasi Kollegiyasi raisini qabul qildi

Oʻzbekiston Prezidenti Shavkat Mirziyoyev 22-oktabr kuni Yevrosiyo iqtisodiy komissiyasi Kollegiyasi raisi Baxitjan Sogʻintayevni qabul qildi.

Uchrashuvda Oʻzbekistonning kuzatuvchi davlat sifatida Yevrosiyo iqtisodiy ittifoqi bilan oʻzaro manfaatli hamkorligining izchil kengayishi qayd etildi. Ittifoq davlatlari bilan oʻzaro savdo va investitsiya hajmlari barqaror oʻsmoqda, logistika aloqalari mustahkamlanmoqda. Oʻzbekiston savdo va yuk tashishni raqamlashtirish, elektron tijoratni rivojlantirish hamda iqlim kun tartibi kabi ittifoqning asosiy tarmoq dasturlarida faol ishtirok etmoqda.

Yevrosiyo iqtisodiy komissiyasi bilan qoʻshma ishchi guruhning toʻrtta yigʻilishi oʻtkazildi va texnik tartibga solish tizimlarini yaqinlashtirish boʻyicha yoʻl xaritasi tasdiqlandi. Oʻzbekiston Yevrosiyo taraqqiyot bankining toʻlaqonli aʼzosi boʻldi, bank bilan hamkorlik loyihalari portfeli shakllantirildi. Tomonlar yil oxirigacha ishchi guruhning navbatdagi yigʻilishini oʻtkazishga kelishib oldi. Shuningdek, savdo toʻsiqlarini kamaytirish, hamkorlikni chuqurlashtirish hamda bojxona va transport jarayonlarini raqamlashtirishga qaratilgan yangi Hamkorlik rejasini qabul qilishning muhimligi taʼkidlandi.