Özbəkistan Prezidenti Avrasiya İqtisadi Komissiyası Kollegiyasının sədrini qəbul edib

Özbəkistan Prezidenti Şavkat Mirziyoyev oktyabrın 22-də Avrasiya İqtisadi Komissiyası Kollegiyasının sədri Baxıtjan Sağıntayevi qəbul edib.

Görüşdə Özbəkistanın müşahidəçi ölkə statusunda Avrasiya İqtisadi Birliyi ilə qarşılıqlı faydalı əməkdaşlığının ardıcıl şəkildə genişləndirilməsi məmnunluqla qeyd olunub. AİB ölkələri ilə qarşılıqlı ticarət və investisiya həcmi sabit artır, logistika əlaqələri möhkəmlənir. Özbəkistan ticarətin və yük daşımalarının rəqəmsallaşdırılması, elektron ticarətin inkişafı və iqlim gündəliyi də daxil olmaqla, birliyin əsas sahə proqramlarında fəal iştirak edir.

Avrasiya İqtisadi Komissiyası ilə birgə işçi qrupunun dörd iclası keçirilib və texniki tənzimləmə sistemlərinin yaxınlaşdırılması üzrə yol xəritəsi təsdiq edilib. Özbəkistan Avrasiya İnkişaf Bankının tam üzvü olub və bank ilə əməkdaşlıq layihələrinin portfeli formalaşdırılıb. Tərəflər ilin sonuna qədər işçi qrupunun növbəti iclasının keçirilməsinə razılaşıblar. Eyni zamanda ticarət maneələrinin azaldılmasına, əməkdaşlığın dərinləşdirilməsinə və gömrük və nəqliyyat prosedurlarının rəqəmsallaşdırılmasına yönəlmiş yeni Əməkdaşlıq Planının qəbul edilməsinin vacibliyi vurğulanıb.