Qozogʻistonda qayta ishlash sanoati eksporti 5 yilda 45%dan oshdi

Qozogʻiston Prezidenti Qosim-Jomart Toqayev Respublika kuniga bagʻishlangan tantanali marosimdagi nutqida mamlakat ilgʻor texnologiyaga asoslangan ishlab chiqarishni rivojlantirish yoʻlini ochganini aytdi. Bu haqda Egemen.kz Prezident Administratsiyasi matbuot xizmatiga havola qilib xabar berdi. Prezidentning soʻzlariga koʻra, soʻnggi 5 yilda qayta ishlash sanoatidagi eksport hajmi 45 foizdan oshgan.

Prezident temir yoʻl sohasida yangi yutuqlarga erishilganini taʼkidladi. Relslar va shpallardan tortib vagonlar hamda elektrovozlargacha kerakli hamma narsa endi mamlakatda ishlab chiqarilmoqda. Avtomobil ishlab chiqarish ham surʻat oldi: har yili konveyerdan 150 mingdan ortiq yengil va yuk avtomobili chiqadi. Soʻnggi yetti yilda jalb qilingan xorijiy investitsiya hajmi 155 milliard dollarga yetdi.

Prezident yil boshidan beri umumiy qiymati 60 milliard dollar boʻlgan 355 ta tijorat shartnomasi imzolanganini aytdi. Qozogʻiston Yevroosiyoning yetakchi transport va logistika xabi sifatidagi mavqeini mustahkamlamoqda. Aeroportlar, vokzallar, koʻpriklar va dengiz portlari qurilgan yoki taʼmirlangan.